Rarasaan mah asa karek kamari DAYEUHLUHUR on FACEBOOK (DoF) ieu dibentuk ku Anto Tardo. Tapi mun ngitung poe, geuning grup ieu teh umurna geus nyampe sataun leuwih. Lain waktu nu pondok keur ukuran umur hiji grup mah, kawilang lilana.
Masih inget keneh pas kuring milu gabung jadi anggota DoF. Sataun katukang, sarua di bulan puasa keneh. Kitu oge pedah diajak ku pun alo, Yodha Oda. Memberna oge karek aya 15 urangna. Lolobana barudak Panulisan deui. Eusi obrolana oge ukur saheureuyeun wungkul.
Teu nyangka pisan lamun dina jangka waktu sataun, DoF berkembang (berkembang bahasa sundana naon nya?) kawilang majuna. Ayeuna oge anggotana geus 942 urang. 58 urang deui jejeg 1000. Nu pastina lain urang Panulisan wungkul. Tapi sumebar di unggal wewengkon 14 desa sa-Kecamatan Dayeuhluhur. Aya oge nu ti luar daerah. Hal eta nandakeun respon anu alus keur DoF.
Pangalolana oge kawilang loba, diantarana: Anto Tardo, Nana Suryana, Cecep Adi Kustaman, Soleh Muttaqin, Yodha Oda, Endom Kustomo, Hanum Sujana, jeung Aziz Sukmana. Rata-rata mah perantau, ngadon buburuh atawa sakola ka luar kota. Aya nu ngarantau ka Bandung (Anto, Nana, Yodha, Hanum, Azis), ka Jogja (Cecep), oge ka Purwokerto (Endom). Tapi ari Kang Soleh mah netep di lembur.
Komo mun ningali tina widang gaweana mah. Mangrupa-rupa kagiatan geus kungsi digelar. Kayaning Ngarumat Lembur, muter pilem, ngajeujeuhkeun nu kuliah ka Sastra Sunda Unpad, konperensi pers, ngagagas Sakola Alam Dayeuhluhur (SADA), jeung lain sejenna.
Dina widang organisasi, DoF oge geus sukses ngalahirkeun sababaraha organisasi gerakan anu ngabogaan konsentrasi dina widang nu bareda. Aya Grup “LEMBUR KURING CILACAP BARAT (LKCB)” nu ahirna rubah jadi “MENUJU KABUPATEN MAJENANG”. Grup nu dipupuhuan ku Cecep Adi Kustaman ieu leuwih konsen kana ngabahas isu pemekaran Kabupaten Majenang. Masalah politik intina mah.
Aya oge Grup “ALIANSI MASYARAKAT DAYEUHLUHUR (AMD)” nu di pupuhuan ku Carsa Han’s Arimpaki. Grup ieu mah leuwih konsen kana wilayah pemberdayaan masyarakat. Model Yayasan atawa LSM (NGO) ceuk bahasa kerenna mah. AMD ieu geus sukses ngabentuk YAYASAN DAYEUHLUHUR BHAKTI PERSADA, hasil babadamian di Bandung.
Sementara grup anu lahir pang bungsuna nyaeta “DAYEUHLUHUR Balik PASUNDAN (DBP)”. Grup ieu dipupuhuan ku simkuring, Nana Suryana. Ari konsentrasi garapanna nyaeta dina widang budaya (culture) jeung lingkungan, pikeun ngarumat tradisi karuhun Sunda ala Dayeuhluhuran supaya tetep kapihara. Hal ieu didasaran ku pamikiran yen “Dayeuhluhur moal tumpur ku dikubur, moal musnah sanajan ditandasa”. Tilu dasar anu moal regrog mun ditohok moal rempag mun di ruag: “KAYAKINAN, SAREAT, jeung AHLAK”. Kayakinan geus diwariskeun, Sareat kudu dilakonan, Ahlak dipilampah.
Sanajan tilu grup ieu boga konsen garapan masing-masing, tapi tetep sagala kawijakana nginduk ka DoF salaku “indung” nu geus ngandungna. Hal ieu ngandung harti yen kawijakan nu dilakukeun moal sampe lanca linci luncat mulang tina tujan asal didirikeun DoF, nyaeta keur ngaberdayakeun masyarakat jeung alam Dayeuhluhur supaya mandiri jeung lestari.
Dina widang jaringan, DoF geus berhasil ngabangun relasi jeung sababaraha instansi. Aya jeung SMAN 1 Dayeuhluhur, Karang Taruna ALECI Rimpaknangsi, Pemerintahan Desa Datar, Pemerintahan Desa Hanum, Pemerintahan Desa Panulisan, Pamarintahan Desa Dayeuhluhur, Humas Cilacap, BRI Dayeuhluhur, Jejaring Wanareja, Cimangu Pesbuk, Wifi Net Dayeuhluhur, Doyan Guyon Prodak Rimpak, Paguyuban Warga Cilacap Barat (PWCB), PPKCB, Komunitas Islam Emansipatoris, Fakultas Sastra Unpad, oge jeung insan Guru tur para “kuli tinta” alias wartawan.
Hanjakalna ti pihak Pamarentahan Kecamatan Dayeuhluhur mah can pati ngarespon. Padahal mah eta teh pupuhu nu sakuduna di Bapa keun ku urang lembur. Teuing pedah Camatna lain warga asli Dayeuhluhur kitu? Bae lah disebut culangung semu rada “nyintreuk” oge, da emang kitu buktina. Sugan we kahareupna mah urang Dayeuhluhur teh boga Camat nu asli pituin Dayeuhluhur, supaya aya rasa babakti nu sanyatana ka lemah cai, lain ukur ngurus administrasi keur “kapanjangan leungeun” ti elite birokrasi hungkul. Punten Pak Camat mun rada kasinggung, meungpeung can Lebaran we kuring wani ngomong kitu teh hehehehe...
Dina widang wacana nu dikembangkeun, pamikiran warga DoF kawilang aheng, jempolan tur beragam. Coba wae tingali dina forum diskusina. Aya nu ngobrolkeun masalah Bahasa Sunda khas Dayeuhluhuran, sajarah hiji wewengkon tur karuhun Dayeuhluhur nu baheulana mangrupa salah sahiji Karajaan, cara ngarumat alam tur ngembangkeun obyek pariwisata nu aya di Dayeuhluhur, oge mintonkeun gambaran foto pangwangunan anu minim kualitas. Aya oge nu ngabahas paripolah elite nu pikasebeleun.
Tangtuna hal ieu ngagambarkeun yen potensi urang Dayeuhluhur ayeuna geus maju jeung beragam. Hal eta tangtuna didukung ku lobana urang lembur nu sarakola luhur tur asak dina pangalaman. Coba we geura tingali profil tiap anggota DoF hiji-hiji. Minimal nu araktif diskusi tur sering nyumbangkeun ide. Lumayan itung-itung keur ngabuburit bari mangpaat. Moal mah nepi ka ongkek geura hehehehe...
Tapi sakumaha rame jeung seriusna diskusi, aya hiji ciri khas nu teu leupas ti urang Dayeuhluhur, nyaeta “Budaya Heureuy”. Sigana geus jadi watek urang lembur mun raresep heureuy teh. Ku ngabandaan sikep kitu, wajar mun keur aya pacogregan dina diskusi, gampang pisan cairna da bari dibawa sempal guyon gogonjakan.
Tapi aneh oge mun masih keneh aya urang lembur anu sok belikan, teu kaopan, alias anti kritik. Teuing pedah geus tabeatna kitu, atawa pedah “kurung batok”. Kuring sorangan pernah ngalaman nasib “sial” kulantaran nulis feature nu judulna “Komedi Artifisial” dina catatan pesbuk sorangan. Teu dinyana aya “oknum nu bageur”, pirajineun daekan moto kopi eta catetan kuring, tuluy disebarkeun ka masyarakat. Atuh warga teh geger, da salah tanggap ngartikeun kecap “pembual”.
Teror dina eSeMeS kuring mani rabul, boh ti anu ngarasa kasindir atawa ti elitna. Samarukna eta kecap teh diartikeun “tukang rahul” alias ngawadul. Padahal mah mun ditingali tina Kamus Besar Bahasa Indonesia (KBBI) terbitan Balai Pustaka, eta kecap ngandung harti jalma nu ngabogaan imajinasi (daya khayal) luhur, keur nyaritakeun hiji nhal anu samanea. Teu percaya? Sok geura buka kamusna! Harti eta pisan nu ku kuring di maksud.
Tapi keun we da geus terlanjur ayeuna mah. Nu penting mah kuring geus nyatakeun siap ngalakukeun klarifikasi dihareupeun “Mahkamah Pengadilan Warga”. Kuring sorangan ngama’lum kana kajadian eta, da meureun budaya kritik oto kritik can can jadi kabiasaan di lembur urang mah hehehehe...
Beuhhhh... naha ngawangkong teh jadi ngalantur kieu? Balik deui kana DoF. Ayeuna urang keur ngarayakeun lebaran. Nu ngarantau di karota pada mudik ka lembur bari mawa simbol kasuksesana. Nu di lembur paciweuh bari bungah sabab kadatangan dulur nu anggang datang. Barudak surak da meunang duit rebuan tinu nyawer. Lembur oge jadi haneuteun.
Tapi susuganan, sakali deui ieu mah susuganan, baraya DoF sadaya pas lebaran ayeuna boga waktu luang, urang tiasa kumpul ngariung sabalung bantur dina raraga silaturrahim atanapi patepang sono warga DoF hususna, tur masyarakat Dayeuhluhur dina umumna. Acarana teh seja digelar dinten Minggu, kaping 3 Syawal 1431 H / 12 September 2010 M, tabuh 09.00 WIB, di Bale Desa Dayeuhluhur. Mangga ka sadaya wargi diantos kasumpinganna. Ahirna, wilujeng tepang taun DoF....
.jpg)
